رضوى الشربيني تكشف مواصفات زوجها المستقبلي

شكل اسم الإعلامية رضوى الشربيني تريند عبر محركات البحث ومختلف مواقع التواصل الاجتماعي بعدما أعلنت مواصفات شريك حياتها المستقبلي.

وأشارت إلى أنها دخلت بقصة حب حقيقية بعد الانفصال، لكن لم تستمر.

وقالت: “قابلت الحب الحقيقي بعد الانفصال ومكنش تعويض عاطفي وإنما قصة حب حقيقية، ولكنها انتهت وأنا مبحبش أتكلم عن القصص اللي انتهت بسبب إننا اتفقنا إننا لا نتفق”.

وذكرت  مواصفات الزوج الذي تبحث عنه: “لازم يكون راجل قادر والقدرة هنا بمعنى إنه يكون قادر على العفو عند المقدرة، عشان ميبيصش على أخطائي ولا صغائر الأمور اللي أنا بعملها، وهيكبر دماغه ومش هيتلككلي ومش هيبص على عيوبي، ولازم يكون قوي ويشاركني كل أموري، ويكون سند وقوته دي تكون معايا مش عليا، ولما يقرر إنه مش عاوز رضوى الشربيني ميعملش أي حاجة غير إنه يجيني ويقوللي في وشي أنا آسف مش قادر أكمل”.

وأضافت: “لازم يكون ناجح، مقدرش أتجوز راجل مش ناجح ولا أنا اكون أنجح منه، ويكون عنده طموح ويتقي ربنا في البني آدمين، ومكونش أنا أولهم لكن مامته وباباه، ولازم يكون بيحبني قوي وبيهتم بيا قوي، ويعرف يتعامل معايا لأن أنا صعبة، ويكون حنين وطيب ودمه خفيف عشان مقدرش أتجوز راجل دمه تقيل أبداً، ويكون شيك وخفيف في نفسه”.

واعترفت بأن الجمهور أخذ عنها صورة المرأة الحديدية، بسبب تصريحاتها المتكررة عن الرجال، ودعمها المستمر للمرأة.

وقالت “الحياة بعد وفاة امي اختلفت كتير وبقيت بعيط قوي، والناس واخده عني صورة المرأة الحديدية اللي من غير مشاعر ولا شعور وده عكس شخصيتي”.

وتابعت: “اكتشفت نفسي ولقيت إني إنسان مش قابل يعيش العيشة دي، ورصيدي في بنوك الوجع أكثر بكثير من قسيمة طلاق، ومقدرش أعد الأوجاع دي”.

واختتمت: “قسيمة الطلاق مش وجع، إنما اللي بتمري بيه في طريقك عشان يوصلك للطلاق هو اللي بيكون وجع، والقسيمة دي بتبقى النتيجة، وانا متوجعتش لما مسكت قسيمة طلاقي في ايدي، ومش في كل الأوقات كلمة إنتي طالق بتوجع، خصوصاً اذا كان عندك قناعة إن الكلمة دي هي دواء مش وجعك”.

• تعرف على الضحية رقم 22 في برنامج رامز جلال
• محمد رمضان يتحدث عن نهاية مسلسله “جعفر العمدة”